正向家庭培育中心

暑假話咁快就過去咗，你嘅孩子有冇大個咗？

 

今個暑假一班升小一小二嘅小朋友，經歷咗一個不一樣嘅夏天。一行20位小朋友，參加咗兩日一夜嘅「大個仔大個女自理營」，由營前集會開始，就比教練「恐嚇」要學懂照顧自己，為自己付起責任，營會規則係要小朋友自己準備好自己嘅背囊及行裝，當真正有需要嘅時候才邀請父母幫忙，目的係讓小朋友有足夠嘅心理準備，可預測會遇上嘅困難，熟悉自己嘅物品，隨時可以取出自己所需嘅裝備。營會嘅口號係「照顧自己、關心別人」，對於這一代「疫情後」同BB一樣嘅小朋友，教練都有諗過會唔會太過嚴苛，不過諗深一層，我哋都係堅持相信孩子，「孩子需要有嘗試嘅空間，父母需要有放手嘅機會。」

 

20位小朋友，大部份都從未離開爸爸媽媽或照顧者超過24小時，有小朋友由集合嘅一刻已經開始大喊，喊住要返屋企，唔捨得離開家人，到半個鐘後要起行時，終於調節完心情可以帶住兩行眼淚出發；兩日一夜嘅行程，小朋友亦經歷咗好多第一次，佢哋要跟住教練，自己買火車票，搭東鐵到大圍轉馬鐵，去到馬鞍山仲要自己小隊採購食材預備煮自己嘅晚餐，雖然天氣欠佳，由野外煮食改為營舍煮食，但仍無阻之後戰戰兢兢去黑夜夜行體驗；第二天一早，就迎接攀樹挑戰，由怕熱怕曬，掂到草已經大驚小怪，到玩到身水身汗，污糟晒都唔願意離開，24小時原來可以帶來咁大嘅改變。