生命故事

喺信主之前，因着環境嘅影響，我會因為學業而好大壓力，活喺世界嘅標準入面，覺得自己要考高分，老師先會覺得我好，覺得自己要乖，其他人先會鍾意我，我要做得好，先值得被愛。我將自己嘅價值放喺呢啲世界嘅標準上，會因為成績而患得患失，聽到人哋拎自己去比較會焦慮不安，覺得自己做極都未夠好，係一個確確實實嘅完美主義者。同時我都唔鍾意同人分享我嘅感受，鍾意將壓力收埋，自己消化佢，但有時都會有覺得吃力嘅時候。

我係喺小六福音營嘅時候信主嘅，福音營裏面講到上帝無條件地愛人，呢份無條件嘅愛同我當時所認知嘅愛有好大分別，原來真係有個神無論你做成點都好，佢話佢都用一樣嘅愛去愛你。我被呢份無壓力、無條件嘅愛所感動，就決志跟蹤主，亦都慢慢學習喺禱告裏面將所擔憂嘅擺上。

信主之後，上帝成為咗我喺大小事上面嘅依靠，我依然對自己有要求，但我慢慢改變咗讀書嘅心態，明白喺上帝裏面，我嘅價值並唔係由區區幾個數字能夠定義得到。我唔再將自己嘅價值放喺飄忽不定嘅成績上，着重同神同行嘅過程多於結果。喺大小事上面感受到從神而嚟嘅平安，令我更坦然面對壓力。喺教會生活裏面，我亦都搵到自己生命嘅價值，知道自己嘅獨特之處，有機會發揮自己嘅恩賜，做咗好多以前覺得自己唔會做到嘅事，同一班人一齊搞慶典活動、由未接觸過鼓到用鼓聲去敬拜神、甚至牧養住一班生命。喺呢啲嘗試裏面，上帝讓我看見我生命真正嘅價值，令我感受到與神同工嘅美好。同時上帝安排咗好好嘅組員、導師陪伴我成長，令我慢慢放低不安全感，放心分享自己嘅感受，唔再收埋自己，融入喺群體當中。

記得導師之前邀請我浸禮，嗰陣嘅我因為身邊嘅人經歷緊好多唔開心嘅事，而覺得自己冇辦法喺環境咁壞、自己對神有質疑嘅時候作出一份好嘅生命見證。神用咗一篇靈修回應我，靈修入面講到「當生命嘅焦點不被環境所影響，就係生命最美好嘅見證。」浸禮唔代表我之後會好硬淨、經歷嘅事會好順利，相反，我依然係好軟弱嘅我，生命依然岩岩巉巉，但我願意喺再壞嘅環境入面都將焦點放喺神到，我想同身邊着緊嘅人分享呢份禮物，喺神裏面，我哋可以誇耀自己嘅軟弱，我哋可以搵返生命嘅價值，我哋可以坦然無懼接受呢份無條件嘅愛。神唔用「夠唔夠好」去衡量我哋，喺神裏面再破碎嘅生命佢都用一樣嘅愛去愛我哋。

我都想藉住呢個機會多謝今日願意嚟睇我浸禮嘅每一個，多謝我嘅屋企人，多謝你哋願意嚟，希望你哋都快啲返教會！多謝身邊着緊我嘅同學朋友，俾credit特登長征入粉嶺嘅大學同學。多謝Lit•tle，喺我呢幾年經歷好多事上同我同哭同笑，雖然成日都講有你哋真係好好，但有你哋喺我生命中出現係真係神嘅禮物。多謝我牧養緊嘅小羊，kindle同mettle每一個生命，讓我有機會同你哋一齊成長。

由決志信主直到今日，我生命中每一個轉變都係上帝嘅恩典，願將一切榮耀頌讚都歸與神。